Sigurganga Tottenham í úrvalsdeildinn tók enda á sunnudaginn var þegar liðið heimsótti Newcastle á St. James Park. Lokatölur 2-2 þar sem Tottenham komst tvisvar yfir í leiknum. Mörk Tottenham skoruðu Van Der Vaart og Defoe.
Fyrri hálfleikur á sunnudaginn var ekki mikið fyrir augað, en Tottenham komst þó yfir með marki frá Van Der Vaart úr vítaspyrnu á 40. mínútu sem dæmd var eftir að Adebayor var felldur í teignum. Staðan í leikhléi var 0-1 fyrir Tottenham. Eftir einungis þriggja mínútna leik í seinni hálfleik hafði Newcastle jafnað og var þar að verki Demba Ba eftir góða fyrirgjöf frá vinstri. Leikurinn í járnum og allt gat gerst. Seinni hálfleikur var mun fjörugri en sá fyrri.
Defoe kom inná sem varamaður fyrir Van Der Vaart á 63. mínútu og aðeins fimm mínútum síðar hafði hann komið Tottenham yfir 1-2, með góðu skoti fyrir utan teig neðst í hornið. Lið Tottenham fékk svo ágætis færi á að komast í 1-3 í tvígang en ekki gekk það upp. Það var svo þegar fjórar mínútur voru eftir af venjulegum leiktíma að Newcastle jafnaði leikinn 2-2. Var þar að verki varamaðurinn Shola Ameobi með þrumufleig frá vítateigslínu vinstra megin sem steinlá í fjærhorninu. Bæði lið fengu svo tækifæri til að taka öll stigin þrjú á lokamínútunum en allt kom fyrir ekki – lokatölur 2-2 sem verða að teljast nokkuð sanngjörn úrslit í þessum leik.
Slæm tíðindi fyrir Tottenham voru meiðsli Ledley King sem þurfti að yfirgefa völlinn á 30. mínútu. Var búist við að hann yrði lengi frá, en svo hefur komið á daginn að meiðslin voru ekki eins slæm og búist var við í fyrstu og talið að hann verði um 4. vikur frá.
Lið Tottenham á sunnudaginn :
Friedel – Walker – King ( Bassong 30 )- Kaboul – Ekotto – Bale – Livermore – Parker – Modric – Van Der Vaart ( Defoe 63 ) – Adeybayor
BÓ
