Tottenham tók á móti Bolton á White Hart Lane í leik helgarinnar. Eftir einungis 6 mínútna leik var Tottenham komið yfir í leiknum með marki frá Van der Vaart, en markið skoraði hann úr vítaspyrnu eftir að leikmaður Bolton handlék boltann innan teigs. Stuttu síðar fengu leikmenn Tottenham aftur vítaspyrnu eftir að Lennon var felldur innan vítateigsins. Van der Vaart steig aftur á vítapunktinn og skoraði af öryggi. Dómarinn dæmdi þó að spyrnan skyldi tekin aftur þar sem leikmenn voru komnir inn í teig þegar spyrnan var tekin. Hann skaut þó framhjá úr endurtekna vítinu og staðan því enn 1-0. Þegar 10 mínútur voru liðnar af síðari hálfleik náðu Bolton menn að jafna leikinn þegar Sturridge skoraði framhjá Gomes. En það var svo í uppbótartíma sem Kranjcar náði að þruma boltanum í netið og tryggja liðinu öll stigin, en hann hafði komið inná þegar um stundarfjórðungur var eftir af leiknum. Lokatölur því 2-1, Tottenham í vil.
Lið Spurs: Gomes, Corluka, Dawson, Gallas, Ekotto, Van der Vaart (Pienaar 46), Jenas, Palacios (Kranjcar 77), Lennon, Crouch (Pavlyuchenko 72), Defoe. Ónotaðir varamenn: Cudicini, Bassong, Hutton, Sandro.
