Tottenham tryggði sig áfram í 16 liða úrslit Meistaradeildarinnar með sigri á Werder Bremen á White Hart Lane í næstsíðustu umferð riðlakeppninnar. Tottenham náði forystunni snemma leiks með marki frá Younes Kaboul. Á lokamínútum fyrri hálfleiks bættu leikmenn Tottenham við öðru marki. Hutton gaf inn í teiginn á Crouch sem skallaði boltann niður til Modric og hann átti ekki í vandræðum með að koma boltanum framhjá varnarmanni og markverði Bremen. Staðan orðin 2-0 í hálfleik. Leikmenn Bremen virtust hafa gefið upp vonina og voru það leikmenn Tottenham sem stjórnuðu leiknum í síðari hálfleik. Dómarinn dæmdi m.a. víti á Bremen og var það Bale sem ákvað að taka vítið en eins og oft hefur komið fyrir hjá Tottenham undanfarið, þá náði Bale ekki að skora þar sem markvörður Bremen varði skot hans. En Tottenham náði að lokum að skora þriðja markið og gera út um leikinn. Bale tók á sprett upp vinstri kantinn og sendi boltann fyrir markið. Boltinn hafnaði í þverslánni og fór þaðan til Lennon sem gaf fyrir á Crouch og hann var ekki í vandræðum og skoraði þar með þriðja og síðasta mark leiksins. Tottenham er því efst í riðlinum þegar ein umferð er eftir en Inter hefur sama stigafjölda. Lokaumferðin mun því skera úr um það hvort liðið hreppir toppsæti riðilsins.
Lið Spurs: Gomes, Hutton, Gallas, Kaboul, Ekotto, Lennon, Jenas (Palacios 19), Modric, Bale (Kranjcar 81), Crouch, Pavlyuchenko (Defoe 57). Ónotaðir varamenn: Cudicini, Corluka, Bassong, Keane.
