Tottenham heimsótti Newcastle á St.James´ Park í fyrsta leik sínum í Carling Cup á þessari leiktíð og hóf þar með titilvörn sína. Tottenham hafði ekki tölfræðina með sér fyrir leikinn þar sem liðið hafði aldrei unnið Newcastle á St.James´ Park í bikarleik í sögu félagsins. En nú varð breyting á þar sem Tottenham vann leikinn 2-1 með mörkum frá Pavlyuchenko og O´Hara en þetta var fyrsta mark Pavlyuchenko fyrir félagið. Mark Newcastle skoraði Owen.

Enn einu sinni gerði Ramos breytingu á liðinu frá síðasta leik. Gomes stóð þó sem fyrr á milli stanganna í markinu en vörnin var skipuð þeim Corluka, Woody, King og Ekotto. Á miðjunni léku þeir Lennon, Jenas, Zokora, O´Hara og Bale og einn frammi spilaði Pavlyuchenko. Á bekknum sátu þeir Cesar, Gilberto, Modric, Bentley, Bent, Campbell og Giovani.

     Fyrri hálfleikur var afar tíðindalítill. Snemma leiks fengu bæði Pavlyuchenko og Gomes að finna fyrir leikmönnum Newcastle þegar brotið var á þeim en þrátt fyrir smá hnjask héldu þeir áfram leiknum eftir smá aðhlynningu frá læknateymi Tottenham. Eftir tæpar 20 mínútur kom fyrsta færi gestanna þegar Bale tók aukaspyrnu og gaf fyrir markið á Woody en skalli hans fór framhjá markinu. Síðar í hálfleiknum áttu Pavlyuchenko og Woodgate báðir skalla að marki eftir föst leikatriði en ekki vildi boltinn inn. Lennon átti gott skot að marki sem fór rétt framhjá. Hættulegasta færi heimamanna kom á lokamínútum fyrri hálfleiks þegar Geremi skaut að marki úr aukaspyrnu og Cacapa náði að skalla boltan að marki en boltinn fór rétt framhjá stönginni. Mjög dapur fyrri hálfleikur og engin mörk skoruð.

     Seinni hálfleikur var þó öllu fjörugri en sá fyrri. Strax á upphafsmínútunum komst Duff nálægt þvi að skora fyrir heimamenn þegar hann kom boltanum framhjá Gomes en Woodgate bjargaði nánast á marklínu. Á 52. mínútu gerði Ramos sína fyrstu skiptingu þegar Bale fór af velli og inná í hans stað kom Giovani. Lennon fór þá á vinstri kantinn og Giovani á þann hægri. Þessi skipting virtist lífga aðeins upp á lið Tottenham og stuttu síðar átti Ekotto þrumuskot vel fyrir utan vítateiginn en Given náði naumlega til boltans. Owen átti færi á hinum enda vallarins en Gomes var vel vakandi í markinu. En eftir 61 mínútu leik kom loksins fyrsta markið. Lennon tók á sprett upp vinstri kantinn, gaf boltann fyrir markið og þar var Pavlyuchenko vel staðsettur og skallaði boltann í netið framhjá Given og var þetta fyrsta mark hans fyrir félagið. Einungis fimm mínútum síðar var forystan aukin þegar O´Hara bætti marki við eftir mistök Newcastle manna. O´Hara hljóp í átt til Taylor, vann af honum boltann og sendi boltann í netið framhjá Given. Á milli markanna gerði Ramos skiptingu þegar Lennon fór af velli og Campbell kom inná í hans stað.  Þegar stundarfjórðungur var til leiksloka kom svo lokaskiptingin en þá fór markaskorarinn, Pavlyuchenko af leikvelli og inná kom Modric en hann var að koma til baka úr meiðslum á hné. Martins átti svo gott skot að marki sem Gomes varði en Gomes gat lítið gert á lokamínútunum þegar Owen kom boltanum í netið. Leiknum lauk því með 2-1 sigri Tottenham og er liðið því kominn í pottinn fyrir dráttinn í næstu umferð í Carling Cup, en dregið verður í hádeginu á laugardaginn.

Lið Spurs: Gomes, Corluka, Woodgate, King, Ekotto, Lennon (Campbell), Jenas, Zokora, O´Hara, Bale (Giovani), Pavlyuchenko (Modric). Ónotaðir varamenn: Cesar, Gilberto, Bent og Bentley.

Tottenham gerði markalaust jafntefli við Wigan á White Hart Lane í fimmta deildarleiknum á tímabilinu og þurfa því leikmenn jafnt sem stuðningsmenn að bíða aðeins lengur eftir fyrsta sigri liðsins á tímabilinu. Liðið situr því enn á botninum með 2 stig eftir fimm umferðir og er þetta versta byrjun liðsins í 34 ár.

     Ramos gerði nokkrar breytingar á liðinu fyrir leikinn. Gomes stóð þó sem fyrr á milli stanganna og vörnin fyrir framan hann var skipuð þeim Zokora, Corluka, Woodgate og Ekotto. Á miðjunni léku þeir Bentley, O´Hara, Jenas og Bale og frammi voru þeir Bent og Pavlyuchenko. Á bekknum sátu Sanchez, Gilberto, Gunter, Giovani, Lennon, Campbell og Huddlestone.

     Fyrri hálfleikur var mjög daufur og lítið um hættuleg marktækifæri. Wigan áttu þó aðeins fleiri færi en Tottenham og þurfti Gomes einu sinni að taka á honum stóra sínum og varði stórkostlega rétt fyrir lok fyrri hálfleiks. Eina hættulega færi Tottenham kom á 18.mínútu fyrri hálfleiksins þegar Bent átti langskot að marki en Kirkland varði vel. Staðan í hálfleik var því 0-0 og liðin ekki að skapa sér mörg tækifæri. Það var því alveg ljóst að eitthvað þurfti að breytast í hálfleik.

     Ramos tók þá ákvörðun að setja Campbell inná í upphafi síðari hálfleiks og af velli í hans stað fór Pavlyuchenko. Ekki breyttist leikur liðsins mikið við inná komu hans ólíkt því sem gerðist í leiknum gegn Wisla Krakow. Ramos gerði því aðra breytingu á 64 mínútu þegar Bentley, sem átt hafði afar slakan leik, fór af velli og inná kom Lennon. Þessi skipting kveikti örlítið líf í leikmönnum Tottenham og átti Lennon hættulega fyrirgjöf fyrir markið stuttu eftir að hann kom inná, eftir hraðan sprett upp hægri kantinn en enginn var þar til að pota honum inn í markið. Stuttu síðar var brotið á Lennon inni í vítateig Wigan manna en Tanner, dómari leiksins, lét leikinn halda áfram þrátt fyrir að ekki væru allir á eitt sáttir með dómgæslu hans. Lennon komst svo einna næst því að skora fyrir Tottenham þegar hann skaut vinstri fótar skoti að markinu en boltinn fór rétt framhjá stönginni. Campbell átti svo góðan möguleika til að skora eftir sendingu frá Bale en hann var einungis nokkrum sentimetrum frá því að ná í boltann. Þegar tíu mínútur voru til leiksloka gerði Ramos þriðju og síðustu skiptingu sína og fór þá Bale af velli og inná kom Huddlestone. Bent, O´Hara og Huddlestone komust allir í hálffæri en það var ekki nóg til að koma boltanum í net Wigan manna. Á lokamínútum leiksins fékk Gomes svo nóg að gera, fyrst munaði litlu að Kapo næði að skora en skalli hans fór yfir markið og stuttu síðar varði hann vel og kom í veg fyrir að Wigan stæli sigrinum. Engin mörk voru skoruð í þessum tíðindalitla leik og skiptu því liðin með sér stigunum.

Lið Spurs: Gomes,  Zokora, Corluka, Woodgate, Assou-Ekotto, Bentley (Lennon), Jenas, O’Hara, Bale (Huddlestone), Pavlyuchenko (Campbell), Bent . Ónotaðir varamenn: Cesar, Gilberto, Gunter, Giovani

Þá er komið að fyrstu hópferð Tottenham klúbbsins á þessu tímabili.  Farið verður á “sigurleik” Tottenham gegn Blackburn þann 23. nóvember næstkomandi.  Flogið verður út með Iceland Express að morgni laugardagsins 22. nóvember,  gist verður á Holiday Inn , Bloomsbury og flogið svo heim mánudaginn 24. nóvember.  Tilvalið að grípa nokkrar jólagjafir í leiðinni.

Verð kr. 73.900

Innifalið í verði er flug, flugvallarskattar, gisting í 2 nætur á Holiday Inn, Bloomsbury ( m.v. 2 í herbergi ) rúta til og frá flugvelli, miði á völlinn og meðlimagjald í stuðningsmannaklúbb Tottenham á Englandi ( þar sem gjöf fylgir með ), en það er orðin skylda að allir sem fara á völlinn verða að vera í meðlimaklúbbnum í Bretlandi.

Flug út :

Iceland Express AEU153         Brottför 08.00              Koma 10.55

Flug heim :

Iceland Express AEU156         Brottför 19.00              Koma 21.50

Gist er á Holiday Inn, Bloomsbury sem er mjög gott 4* hótel í hjarta borgarinnar.  Tottenham klúbburinn hefur áður gist á þessu hóteli við góðan orðstír. 

Upplýsingar um hótel
http://www.londonhotelsite.com/hotel_london/Holiday_Inn_Bloomsbury.htm

Linkur til að skrá sig og borgar staðfestingar gjald :

http://expressferdir.is/PackageIntro.aspx?Package=283

Tottenham vann fyrsta sigur sinn á tímabilinu þegar þeir tóku á móti pólska liðinu Wisla Krakow í Uefa cup á White Hart Lane. Var þetta fyrri leikur liðanna í umspili um sæti í riðlakeppni Uefa cup en seinni leikurinn er í Póllandi 2. október. Leiknum lauk með 2-1 sigri Tottenham og verður leikurinn því erfiður í Póllandi þar sem markamunurinn er sáralítill. Mörk Tottenham í leiknum skoruðu þeir David Bentley og Darren Bent en sá síðarnefndi skoraði einnig annað mark sem var ranglega dæmt af.

     Ramos þurfti að gera breytingar á liðinu frá síðasta deildarleik þar sem Corluka og Pavlyuchenko mega hvorugir taka þá í evrópuleikjunum eftir að hafa spilað fyrir fyrrum lið sín í evrópuleikjum. Á milli stanganna í markinu stóð Gomes sem fyrr. Vörnin var skipuð þeim Gunter, Woodgate, King og Bale og á miðjunni byrjuðu þeir Bentley, Jenas, Zokora og Lennon. Giovani lék sem tengiliður milli miðju og sóknar en Bent lék einn frammi. Á bekknum sátu þeir Sanchez, Huddlestone, Gilberto, Dawson, Ekotto, O´Hara og Campbell.

     Leikmenn Tottenham komu nokkuð ákveðnir til leiks enda orðnir leiðir á árangri síðustu vikna og því hungraðir í sinn fyrsta sigur á tímabilinu. Bentley hóf leikinn sprækur á hægri kantinum og átti ágætisfyrirgjöf sem Pawelek í markinu náði að grípa. Á 24.mínútu tók hann hornspyrnu og gaf á Woodgate á fjærstönginni sem skallaði að marki en markvörður Wisla náði að verja vel. Sjö mínútum síðar átti hann góða sendingu á Bent sem komst einn á móti markverði Wisla og en Pawelek tímasetti úthlaup sitt vel og náði til boltans. En á 33.mínútu sá Bentley bara sjálfur um að koma Tottenham yfir í leiknum. Lennon hljóp upp vinstri kantinn og inn í teiginn þar sem hann gaf boltann fyrir markið og Bentley var vel staðsettur og skaut boltanum í vinstra hornið. Staðan því orðin 1-0 fyrir heimamenn og gífurleg fagnaðarlæti brutust út á White Hart Lane. En það breyttist fljótt því strax í næstu sókn náði pólska liðið að svara fyrir sig. Boguski komst fram hjá Bale á hægri kantinum, gaf á Brozek sem renndi boltanum á Jirsak þar sem hann var einn og óvaldaður og kom boltanum framhjá Gomes í markinu. Lítið markvert gerðist svo það sem eftir lifði fyrri hálfleiks og var staðan því jöfn 1-1 í hálfleik.

     Leikmenn Spurs byrjuðu seinni hálfleikinn betur en gestirnir og bæði Bentley og Giovani áttu góð færi til að koma Tottenham yfir. Darren Bent skoraði svo fullkomlega löglegt mark sem var ranglega dæmt af. Bale sendi boltann á Jenas á vinstri helmingi vítateigsins. Sendingu hans fyrir markið potaði Bent svo í markið en línuvörðurinn dæmdi rangstöðu á Jenas og og markið því dæmt af. Endursýning á atvikinu sýnir að Jenas var fullkomlega réttstæður þegar sendingin kom frá Bale og dómurinn því rangur. En það var lítið við því að gera og staðan því enn jöfn. Á 57.mínútu ákvað Ramos að gera breytingu á liðinu og gerði tvöfalda skiptingu. Gunter og Lennon fóru af velli og inná komu O´Hara og Campbell, en þetta var fyrsti leikur hans fyrir liðið eftir að hafa komið á láni frá Manchester United. Campbell tók þessu verkefni af mikilli alvöru og var strax hættulegur fyrir framan markið og barðist vel til að vinna boltann. Hann kom svo við sögu á 73.mínútur þegar hann fékk langan bolta sem hann móttók glæsilega, lék á varnarmann pólska liðsins og gaf boltann fyrir markið á Bent sem skallaði boltann í netið. Staðan orðin 2-1 fyrir Tottenham. Stuttu síðar munaði svo litlu að Campbell sjálfur næði að skora eftir fyrirgjöf frá Bale á vinstri kantinum. En varnarmaður Wisla Krakow rétt náði til boltans rétt á undan Campbell. Mörkin urðu ekki fleiri þetta kvöldið og er markamunurinn á liðunum ekki mikill og verður því erfitt verkefni fyrir Spurs að fara til Póllands. En leikmenn verða bara að taka því verkefni eins og öðrum og leggja upp með það markmið að sigra þann leik.

Lið Spurs: Gomes; Gunter (O’Hara), Woodgate, King, Bale, Bentley, Zokora, Jenas, Lennon (Campbell), Giovani (Assou-Ekotto), Bent.   Ónotaðir varamenn: Cesar, Huddlestone, Gilberto, Dawson

Tottenham tapaði fyrir Aston Villa á White Hart Lane á mánudagskvöldið og var þetta þriðji tapleikurinn af fjórum leikjum sem leiknir hafa verið á tímabilinu. Liðið situr því sem stendur í botnsæti deildarinnar með einungis 1 stig. Leiknum lauk með 2-1 sigri Aston Villa þar sem Villa komst í 2-0 með mörkum frá Reo-Coker og Young en Bent skoraði eina mark Tottenham.

Tottenham tilkynnti á miðnætti í gær að félagið hefði selt Berbatov til Manchester United áður en glugginn lokaði. Kaupverðið var gefið upp og mun vera 30.75 milljónir punda auk þess sem Tottenham fær framherjan unga Fraizer Campbell á láni út leiktíðina.