Tottenham komst áfram í 16.liða úrslit UEFA Cup eftir að hafa lagt Slavia Prag samanlagt með þremur mörkum gegn tveimur. Fyrri leiknum lauk með 2-1 sigri Tottenham og liðin skildu svo jöfn á White Hart Lane og skoruðu sitthvort markið. Mark Tottenham skoraði Jamie O´Hara strax á 7.mín en liðinu tókst ekki að bæta við og Slavia jafnaði leikinn en komust þó ekki lengra. Tottenham mætir því PSV í næstu umferð.

Jói útherji býður meðlimum Tottenham klúbbsins upp á tilboð á treyju klúbbsins í tilefni úrslitaleiksins á sunnudaginn. Gegn framvísun klúbbskírteinis fá félagsmenn treyjuna á 5000 kr en takmarkað magn er í boði og því gildir að fyrstur kemur, fyrstur fær.

Nauðsynlegt er að framvísa klúbbskírteininu!

Nú ættu félagsskírteini klúbbsins að hafa borist meðlimum ásamt blaði klúbbsins. Ef einhver hefur ekki fengið skírteinið sitt en hefur greitt ársgjaldið þá getur sá hinn sami haft samband við Sigrúnu í tölvupósti á ms.keane@hotmail.com.

Í tilefni af úrslitaleiknum í Carling Cup sunnudaginn 24.febrúar hvetur Tottenham klúbburinn stuðningsmenn liðsins að mæta á Ölver, Glæsibæ og horfa á leikinn í góðra manna hópi. Salurinn verður opnaður töluvert fyrir leik, eða kl.hálf eitt, svo stuðningsmenn geti spjallað saman og kynnst öðrum stuðningsmönnum. Leikurinn hefst svo klukkan 15:00 en útsending hefst hálftíma fyrr með ýtarlegri upphitun. Tilboð verða á veitingum fyrir klúbbmeðlimi gegn framvísun klúbbskírteinis þar til leik lýkur.

Tottenham vann nauman útisigur á Slavia Prag í fyrri viðureign liðanna í 32.liða úrslitum UEFA cup. Leiknum lauk með 2-1 sigri Tottenham en seinni leikurinn fer fram að viku liðinni. Mörk Tottenham skoruðu þeir Dimitar Berbatov og Robbie Keane.

Tottenham vann sinn annan útisigur í stjórnartíð Ramos þegar liðið lagði botnlið Derby á Pride Park. Leikurinn var ekki hinn skemmtilegasti fyrir áhorfendur en leikmenn Tottenham tryggðu sér öll stigin á síðasta hálftímanum í leiknum og unnu leikinn með þremur mörkum gegn engu. Mörkin skoruðu þeir Robbie Keane, Younes Kaboul og Dimitar Berbatov úr víti.

Damien Comolli staðfesti það á heimasíðu Tottenham að Gareth Bale muni ekki leika meira með liðinu á þessu tímabili. Bale meiddist í desember í leik gegn Birmingham og fór í framhaldi af því í aðgerð á fæti. Hann losnaði svo við gifsið af fætinum í dag en læknar telja þó að hann nái sér ekki að fullu á þessu keppnistímabili og sökum ungs aldurs vilja yfirmenn Tottenham ekki flýta honum um of inn í aðalliðið á ný.

Við óskum Bale góðs bata og hlökkum til að sjá hann í hvítu skyrtunni á ný í sumar

Tottenham og Manchester United skildu jöfn þegar meistararnir heimsóttu Tottenham á White Hart Lane. Liðin mættust í annað sinn á einni viku en fyrri leiknum lauk með sigri United í FA bikarnum. Í þetta sinn leit allt út fyrir að Tottenham væri að leggja United að velli en gestirnir jöfnuðu á lokamínútunni í uppbótartíma og nældu í óverðskuldað stig enda Tottenham verið mun betri í leiknum. Berbatov kom Tottenham yfir en jöfnunarmarkið var sjálfsmark frá Dawson þó það sé af sumum fréttamiðlum eignað Tevez.

Tveir leikmenn Tottenham voru lánaðir í gær í félagaskiptaglugganum. Stalteri fór á láni til Fulham og Gardner var lánaður til Everton. Báðir lánssamningarnir gilda út tímabilið.

Tottenham staðfesti undir lok félagaskiptagluggans að þeir hafi fest kaup á brasilíska vinstri bakverðinum, Gilberto frá Herthu Berlin. Gilberto da Silva Melo eins og hann heitir fullu nafni er 31 árs brasilískur landsliðsmaður sem hefur spilað síðustu þrjú ár í þýskalandi með Herthu Berlin og lék alls 101 leik fyrir þá. Hann getur spilað bæði stöðu vinstri bakvarðar og vinstri kantmanns og gefur því Ramos fleiri möguleika á vinstri helmingi vallarins en fyrir eru þeir Bale, Ekotto og Lee hjá félaginu en Bale og Ekotto eiga í langtíma meiðslum.

Við bjóðum Gilberto velkominn til Tottenham.